Сэмэн Данилов

Сэмэн Петрович Данилов - саха норуодунай бэйиэтэ.

	Сүрэҕэлдьиэ суохтаах сүрэх! Сүрэххин сүрэҕэлдьитимэ. Үлэлииргэ өрүү үөрэт, Уоскутума, өрөтүмэ.
	— Сүрэх / Семен Данилов. Үһүс том. - Дьокуускай : Бичик, 2012, с.57

• Тыл - санаа. Тыл баайа - санаа баайа.

Ырыа

Көмүс күнүм санньыйа Киирэр сирин былдьаста, Маайа ынах хамыйа Барар кэмэ уолдьаста. Ыллыыр чыычаах утуйан — Айылҕабыт чуумпурда, Оттуур колхоз уурайан, Отуу уота умайда. Паарка ыллаан эрдэҕэ Маннык наамыын киэһэҕэ, Эдэр ыччат биэрэккэ Эһиэкэйин эттэҕэ... Намыын киэһэ дьаарбайа, Тахсыах эрэ Даарыйа, Сээкэй туһун аттара Сэһэргэһиэх таарыйа.

ТАЛЫЛЛЫБЫТ АЙЫМНЬЫЛАР иккис том 1977 9 с.

САХА ҮҤКҮҮТЭ

                        Е. Степановаҕа

Үрүмэччи үөрүн курдук,

Арыы-дьэҥкир халлаан курдук,

Көөнньөрүүлээх кымыс курдук,

Көҥүл санаа кыымын курдук

Дьоллоох саха кыргыттара

Чороон тутан таҕыстылар.

Ойуу-дьарҕаа тирэҥсэлэр

Оһуор үктээн киирдилэр,

Нуоҕай лабаа илиилэр

Дьол ырыатын тистилэр...

Үерэ сөхпүт санаабар

Алаас тыала аҥыс гынар.

Чуумпу Лена долгунунуу,

Туундара үрүҥ кубатыныы,

Алаас хотун хатыҥыныы,

Атан эрэр ньургуһуннуу,

Намыыннарын, наскылларын,

Нарыннарын баҕастарын!

Кэрэ бэлиэ кэпсээн курдук,

Сэрэтиилээх сэһэн курдук,

Ылбай чаҕаан ырыа курдук,

Ыраас таптал тылын курдук

Сахам намыын үҥкүүтэ

Сахам сирин кэриэтэ!

(ТАЛЫЛЛЫБЫТ АЙЫМНЬЫЛАР

иккис том 1977 353 с.)

Киһиэхэ - төрөөбүт дойдута

Киһиэхэ - төрөөбүт дойдута

Төрөппүт ийэтин кэриэтэ:

Сүрэҕин ытатан, ыллатан,

Норуот кырдьыгар үөрэтэр.

Киһиэхэ - төрөөбүт дойдута

Төрөппүт аҕаҕа холонор:

Тоҥорон, буһаран, эрчитэн,

Ньыгыл укулаат оҥорор.

"Киһиэхэ - төрөөбүт дойдута" хоһоонтон.

Кэс тыл хоһоонтон

	Алааскар эн мас үүннэрэн хааллардаххына - Хас саас аайы сэбирдэх буолан тыллыаҥ, Күнүҥ сирин таптаан ыллаабыт буоллаххына - Күн аайы, күнү кытта эн тиллиэҥ.
	— Семен Данилов. Хоһооннор. Бичик, 2008. С.94

Сылаас-сырдык сыдьаайдан Саха оһоҕунуу. Баай дууһалан, баай санаалан Саха тылыныы. Хаһан даҕаны кырдьыбат, Хаһан даҕаны өлөн сүппэт, Хаһан даҕаны баттаҕа аастыйбат Арай дьиҥнээх таптал эбит.