Дьол

Дьолго сыһыаннаах сомоҕо домохтор

Дьоло билиэ

Дьолго сыһыаннаах өс хоһоонноро

Балык ыамнаах, киһи күннээх
Күнүм буолла: күөнэҕим таҕыста
Күнэ да күөнэҕэ да буолбут
Күнүм буолла: күөрэгэйим ыллаата
Көтөр кынаттаах көтөргө, киһи дьолго ананан айыллыбыттар
Уол оҕо дьолун туох да билбэт
Дьол хараҕа суох
Уол оҕо дьоллоох, соноҕос ат соргулаах
Дьоллоох киһи бириэмэни билбэт

Айымньыттан быһа тардыылар

Оо, Татыйаас!.. Көмүһүм сыыһа!.. Тыыныҥ быстаары сытан, уҥуох-тирии илиигинэн илиибин бобута тута-тута: "Иһит, доҕоччуок, мин эйиэхэ кыра да хом санаата суох баран эрэбин... Төһөтүн да иһин мин эйигинниин дьоллоохтук олордум..." диэхтээбитиҥ. Ол түүн, халтаһаҕын сабан баран, ампаар кэтэҕэр соҕотох олорон, ити тылларгын саныы-саныы, ытамньыйан ылбытым. Миигин уоскутаары эттэҕэ диэх курдук санаан аһарбытым маҥнай. Кырдьыга да, мин эйиэхэ мааны таҥаһы таҥыннарбытым да ахсааннаах буолуо. Эгэ көмүс киэргэл-той кэтэрдэн үөрдэр кэлиэ дуо? Ол да буоллар эн кыларыйан турар кырдьыккын эппитиҥ. Дьол диэн - бэйэ-бэйэни үчүгэйдик санаһан, тиһэҕэр тиийэ эрэнсэн-итэҕэйсэн, биир эт-хаан буолан олоруу. Дьол диэн - бар дьону кытта бииргэ үлэлээн, бииргэ эрэйдэнэн, бииргэ үөрсэн, хомойсон, ытыктабыл үөһүгэр сылдьыы. Дьол диэн - оҕолор, сиэннэр. Ама мин эйигин таптаабатах, эйигин итэҕэйбэтэх бэйэлээх буолуом дуо. Дьонугар-сэргэтигэр эн курдук ытыктанар дьахтар ахсааннаах ини...

Хоһооннортон быһа тардыылар

	Дьолу мин уларсабын Дьоллоох дьон ырыатыттан, Мин кинини булабын Эн үөрэр хараххыттан.
	— Дьол, Семен Данилов

	Дьоллоох олоҕу тэрийбэккин үөһэттэн, Дьолу тутар анал бэриллэр Эйиэхэ.
	— Гавриил Адамов. Үтүө баҕа санаам миэнэ.2014.

	Тот күҥҥэ дьол суолтатын Толкуйданыллыбат даа эбит, Үчүгэй күҥҥэ үтүө төрдүн Өйдөнүллүбэт даа эбит, Эдэр, элиэр эрдэххэ Этэҥҥэ олорор эргимтэтин Эгэлгэлээн билиллибэт даа эбит!...
	— А.Е. Кулаковскай, Ырыа-хоһоон/Эр аһыыта.- Якутскай, 1978, С. 187